Valka er kokkur vikunnar

22.Mars'17 | 07:16

Valgerður Vilmundardóttir (Valka ) er kokkur vikunnar,  hún ætlar að bjóða upp á sérbökuð hamborgarabrauð og humarborgara.

Af einhverjum ástæðum hefur ekki þróast mikil hefð fyrir hamborgarabrauðum á Íslandi þrátt fyrir að Íslendingar kunni vel að meta góða hamborgara. Einungis ein tegund af hamborgarabrauðum virðist fáanleg á landinu og ekkert bakarí hefur, að minnsta kosti svo við vitum, lagt metnað sinn í að bjóða upp á sérbökuð hamborgarabrauð.

Það er því bara eitt að gera – baka sín eigin hamborgarabrauð. Þetta er afskaplega einföld en jafnframt fantagóð uppskrift og það tekur einungis rúman klukkutíma að gera hana, frá því að byrjað er og þar til að brauðin koma úr ofninum. Kosturinn er líka að þegar maður bakar sín eigin brauð getur maður miðað til dæmis stærð brauðanna við stærð hamborgaranna sem til stendur að gera. Þá er gott að nota spelt að hluta til að gera brauðin aðeins grófari og bragðmeiri.

Hamborgarabrauð

10 dl hveiti eða 7,5 dl hveiti og 2,5 dl spelt (auk hveitis til viðbótar þegar deigið er hnoðað)
4 dl volg mjólk
1 dl volgt vatn
1 bréf þurrger
2 msk akasíusíróp eða 1 msk sykur
1/2 tsk salt
3 msk ólívuolía


Hitið mjólkina og vatnið varlega. Það má gera í örbylgjuofni. Vatnið á að vera rétt volgt, ekki heitt, þegar putta er dýft ofan í. Hrærið geri, sírópi, olíu og salti saman við. Látið standa í 5 mínútur. Blandið þá saman við hveitið og hrærið vel saman. Setjið deigið, sem á að vera svolítið blautt í sér, á þurran flöt ásamt smávegis af hveiti eftir þörfum. Hnoðið í 2-3 mínútur. Mótið í rúllu og skerið niður í 6-8 bita og mótið í bollur. Setjið á ofnplötu, þrýstið aðeins á hverja bollu fyrir sig og leyfið bollunum síðan að hefast í a.m.k. 30 mínútur.

Ef vill má pensla brauðin með pískuðu eggi til að gefa þeim flottan lit og strá smá sesamfræjum yfir áður en þau eru bökuð.

Bakið í allt að 15 mínútur við 200 gráður.

Humarborgari
500 gr nautahakk , 100 gr beikon , 50 gr rjómaostur, 100 gr rifinn ceddarostur,  salt og pipar.

Á milli - Tómatur, kál, steiktir sveppir, ostur, hvítlaukssósa og hvítlauks steiktur humar.

Hamborgarabuff
500 g nautahakk
150 g rifinn cheddarostur
50 g rjómaostur
20 g fajita kryddblanda
1 msk. srirachasósa
Salt og pipar
100 g saxað beikon

Öllu blandað saman og mótað í 4 buff.

Porterborgari með rauðlaukssultu og sykurbrúnuðu beikoni

Toasted porter rauðlaukssulta
4 meðalstórir rauðlaukar
3 hvítlauksgeirar
1 tsk. chiliduft
1 tsk. engiferduft
2 msk. edik
2 msk. púðursykur
2 msk. hlynsíróp
100 ml toasted porter bjór
Allt sett í pott og soðið niður uns verður að sultu.

Sykurbrúnað beikon
8 beikonsneiðar, tvær á hvern borgara
30 g púðursykur
Beikon sett í ofnskúffu, púðursykri stráð yfir og steikt í ofni á 180°C í um 10 mín.
 
4 sneiðar cheddarostur
4 hamborgarabrauð
Majónes
Lambhagasalat
Tómatsneiðar
Smjörsteiktir sveppir
Buffin grilluð eða steikt með sneið af cheddarosti. Majónes sett á hamborgarabrauð ásamt lambhagasalati, tómatsneiðum, toasted porter rauðlaukssultu, smjörsteiktum
sveppum og sykurbrúnuðu beikoni.

Njótið vel og verði ykkur að góðu, þið sem prófið.  Ég ætla að skora á Birnu Elínardóttir að vera næsti kokkur vikunnar.