Sara Hrund í fríi frá knattspyrnu vegna höfuðmeiðsla

4.September'17 | 08:35
14102532_10205807658385323_8112556177457024181_n

Mynd/ Sara Hrund

Sara Hrund Helgadóttir leikmaður Grindavíkur í meistaraflokk kvenna hefur orðið að taka sér frí frá knattspyrnu vegna höfuðmeiðsla. Allt er þegar 6 er... skrifaði Sara inn á Facebooksíðu sína á dögunum. 

Sjötti heilahristingurinn minn er staðreynd, stöðug barátta við höfuðverki í 8 ár, þetta byrjaði allt vegna rangra viðbragða við höfuðhöggi, það er því miður staðan. Fótbolti hefur verið líf mitt síðustu 20 árin og þess vegna lét ég þetta ekki stöðva mig enda hefur fótboltinn gefið mér svo mikið, meðal annars að fara til Bandaríkjanna og upplifa drauminn minn. En núna er kominn tími til þess að stoppa og hlusta á líkamann, ég rotaðist í leik fyrir rúmum 2 vikum og hélt áfram að spila í rúmar 15 mínútur og eftir það hefur daglega lífið mitt raskast verulega.

Á 2 vikum fór ég frá því að spila heilan fótboltaleik vandræðalaust í það að 10 mín göngutúr veltur vandræðum. Framundan hjá mér eru strembnir mánuðir í endurhæfingu þar sem ég ætla að tækla þetta og ná mér. Því eru takkaskórnir settir tímabundið til hliðar og ég ætla að einbeita mér að því að ná mér.

Ég vona að ég geti verið víti til varnaðar fyrir aðra og að viðbrögð þeirra sem standa að liðunum verði betri. Viðbrögð við höfuðhöggum á Íslandi eru því miður ekki nógu góð og ég vona að fólk fari að taka þau alvarlega. Það er auðvelt að bregðast við meiðslum líkt og beinbrotum þar sem þau eru sýnileg, höfuðáverkar eru ekki sýnilegir en það gerir þá engu að síður mjög hættulega og afleiðingar geta verið alvarlegar.

Ef þið fáið höfuðhögg og finnið fyrir einkennum, farið útaf!!  Ábyrgðin er þó ekki hjá leikmanni sem er ekki alltaf með getu að segja til um hvort hann geti haldið áfram, það er því er mjög mikilvægt að þjálfarar og sjúkraþjálfarar séu meðvitaðir um einkenni og afleiðingar höfuðhögga! 


Takk fyrir samveruna innan sem utan vallar, þetta hefur verið frábært og vonandi verða leikirnir fleiri í framtíðinni.

Við óskum Söru Hrund góðs bata og vonum að hún geti tekið þátt í knattspyrnu í framtíðinni.